डियर तुकोबा -विनायक होगाडे

आज वाढदिवसानिमित्त बाबासाहेब तुकोबांना भेटायला गेलेत...❤️

भीमराव आले | तुकोबांच्या भेटी |
इंद्रायणी काठी | भेट झाली ||

जाहली दोघांची | उराउरी भेट |
उरातले थेट | उरामध्ये ||

दोघांनी नदीत | सोडियले पाय |
शहारली माय | इंद्रायणी ||

भीमा म्हणे तुका | आलो भेटावया |
प्रत दाखवाया | संविधान ||

हरकला तुका | कौतुक अमाप |
भीमा देई थाप | पाठीवरी ||

करण्या हे साध्य | केले तू सायास |
मोठा तो अभ्यास | तुका म्हणे |

सोडूनिया भीड | झाला तू वांड |
मुकियाचे तोंड | तूचि झाला ||

जाळे मनुस्मृती | वर्चस्वाचा मार |
म्हाराचा जोहार | नष्ट केला |

उद्धारी अस्पृश्य | तू 'मूकनायक' |
जगण्या लायक | शूद्रा केले |

'काळाराम' लढा | धीटाईने दिला |
बघ हरकला | चोखामेळा ||

केला 'चवदार'| पाण्याचा संघर्ष |
झाला बघ हर्ष | पांडूरंगा ||

भीमा म्हणे तुका | धरला मी हेका |
तुझाच रे ठेका | संघर्षाचा ||

तू आधी राहिला | शूद्रांच्या पाठीशी |
धरिले पोटाशी | अस्पृश्यांना ||

राहिलो मी उभा | तुझ्या खांद्यावर |
समता संगर | झाला सोपा ||

आभाळाएवढा | तुकाचा व्यासंग |
भीमा त्याच्या संग | बैसलेला ||

कल्पना तुकाची | सामान बांधले |
भेटाया निघाले | शाहूराया ||

दोघे निघोनिया | गेले एक दिशा |
कौतुक आकाशा | आवरेना ||

- विनायक होगाडे

'डियर तुकोबा' या पुस्तकातून...